Lawikê min qêrîna seba azadî yê! 

Rozerîn Kahraman dewa Mezrasur de amaya dinya û wija (ocade) de biya pîl(gird). Dewa Mezrasur nezdiyê Xozata Dêrsimî ya. Seba cengê mabeynê  gerîlayanê kurdan û eskeranê tirkan keyeyê  Rozerîni mecbûr mend ke dewa xo ca verdê û bar bikerê şirê Xarpêt (Elezîz). Rozerîn keyeyêdo muzîkalîst ra yena.Di birayê ay estê ke hem cenenê hem zî lawikî vanê. A hewna wirdî bî ke jêhateya ay ê muzîkalîstey û vengê ay o weş ama asayene. A xo bi xo cenayişê tembûreyî mûsê. 

Rozerîni waştê ke muzîkî ser o biwanê û notayan bimûso. Bi teşvîkê birayê xo Comerdî ya ay Xarpêt de dest bi konservatûarê kerd. O wexta bi kurdkî qiseykerdeni û lawikî vateni qedexe bî. Labirê Rozerîni goş nêna qedexeyî û bi awayêdo nimiteya hem tembûre cena hem zî bi ziwanê dayika xo ya lawikî va. Waziyetê siyasî seba kê (aîle) Rozerîni her ke şî xirabêrî bi. Rozerîni koşber bî û amê Swêd. Serda 1988 û nata yo ke a Swêd de roşena û xebata muzîkî kena. 

Rozerîn bi lehçeyanê  kurdkî kirmanckî û kirdasî û tirkî  ya lawikî vana. A xeylê welatan de beşdarê programanê  Tv, radyo, festîval û konseran biya. Heta nika di albumî  û hîrê vîdeoyê ay ê muzîkî vejiyayê. Ay albumanê hunermendanê bînan de zî ca giroto. Rozerîni bi xo tekstanê xo nûsena. Muzîkê ay de bêrîkerdena seba azadî û protestoyê duştrê niheqey esto. Helbet muzîkê ay de hîs û heskerdeni zî esta. Şîarê ay, ” Lawikê min qêrîna seba azadî yê!” yo. 

 

www.rozerin.com

www.rozerinkahraman.com